老來得子總好過老蚌生珠啊！盤點娛樂圈8大高齡爸爸 最大年紀係60歲？！

今年8月喺峇裡舉行婚禮嘅鄭嘉穎同陳凱琳宣布有喜，大批藝人同網民紛紛敬賀，不過就有網民留言話鄭嘉穎老來得子，第時想湊細路都有心無力。其實喺娛樂圈中都有唔少男藝人係高齡爸爸，今次就同大家盤點一下以下8個男藝人啦！

撰文：東方新地 ｜圖片：Instagram

盤點娛樂圈8位高齡爸爸

1. 鄭嘉穎

新鮮滾熱辣嘅又點少得49歲嘅鄭嘉穎啊！今年8月同老婆陳凱琳喺峇裡島行禮，結婚3個月，11月22號晚就雙雙喺Instagram報喜，有網民就質疑係咪有咗先結婚，不過同時都有不少圈中藝人同粉絲道賀。

兩人今年8月喺峇裡島舉行婚禮

當時有唔少圈中藝人出席婚禮，好似王智賢、馬國明、唐詩詠等

二人互相呼應，同步出Post，太太陳凱琳用英文，鄭嘉穎則以中文發表相同的感言。

2. 郭富城

現年53歲嘅郭富城喺2017年4月同方媛（Moka）結婚，同年9月Moka誕下女兒Chant。

城城結婚，Cool魔（張智霖）都有份做兄弟

二人結婚當時已經有傳方媛有喜

有報道指Moka於2017年9月1日在養和醫院誕下BB，惟兩公婆及城城經理人小美都封口不提。不過首次榮升人父嘅城城突然喺社交網興奮曬全家福，上載一張一家三口手指相，宣布BB出世！城城留言：「開心、微妙、感恩！我們仨！成長、家庭、守護！」還有一張「Welcome little one」字樣的圖片。

郭富城抱愛女慶生 方媛高調首曬全家福

今年10月，方媛就喺社交網分享同老公慶生照，更首度高調曬出一家三口合照。不過為咗唔曝光囡囡正面樣，方媛就用個公仔遮住，相中1歲半嘅Chant睇落已經大個咗好多！而城城就一臉慈父樣抱住愛女，天王嫂方媛留言：「Happy birthday！」一家人簡直幸福滿瀉呀。

3. 黎明

51歲嘅黎明自從2012同樂基兒離婚後，2017年同女助手Wing Chan結婚，而且當時仲驚爆老婆懷孕。今年4月22日阿Wing早產一個月誕下五磅B女，女女同黎明細個仲好似樣添！

當年為了密冚懷有天王B，阿Wing已經甚少返工，免大肚消息通天，就算陀住巨肚都係獨來獨往睇車入貨上倉添置BB用品，雖然Leon冇辦法時刻陪伴身邊、手拖手出入，但對BB嘅所有狀況佢都一直掌握得好清楚。

天王女容貌正式曝光，B女單眼皮兼小嘴仔，肥嘟嘟，網友紛紛大讚BB女好可愛，有如「迷你版黎明」！

4. 陳小春

現年51歲嘅陳小春同老婆應采兒喺2010年結婚，13年誕下仔仔Jasper（當時陳小春46歲）。相信大家對於小春一家並唔陌生，因為佢哋經常參與內地綜藝節目，Jasper仲喺《爸爸去哪兒》大受觀眾喜愛。

小春同Jasper真係極度似樣，將二人對調身體都毫無違和感。

小春喺《爸爸去哪兒》入面一開頭對Jasper都好嚴厲，但係後來收到老婆下令唔可以咁惡對仔仔之後，都睇得出小春喺之後嘅旅程收斂咗。

5. 爾冬陞

60歲的爾冬陞被踢爆老來得女，與圈外女友育有一個已兩歲大的囡囡，他表示最初接受不到事實及震驚：「睇住個女令我有驚喜，重新學習好多嘢！」並計劃安排女兒來港讀書。

6. 姜大衛

入行五十多年的姜大衛，當年49歲再做爸爸，與太太李琳琳生孻仔卓文，孻仔與大女依蘭年齡相差21年，現年22歲的卓文有意入行。

7. 謝賢

「四哥」謝賢當年以44歲之齡初為人父，同狄波拉誕下謝霆鋒，亦係老來得子，之後46歲再誕下謝婷婷，湊夠一個「好」字。

8. 吳孟達

現年66歲的吳孟達早年經曆兩次婚姻失敗，先後誕下一對孖女及第三名女兒，至96年與第三任妻子侯珊燕奉女成婚，誕下吳楚妮，到03年達哥51歲終於老來得子，將幼子視為金叵羅。

參考來源