徐若瑄富商老公曾陷財困，捱過破產危機~稱老婆是靈魂伴侶，感謝她的支持和鼓勵！
火星人
徐若瑄同新加坡商人李雲峰係2014年結婚，當時好多人覺得徐若瑄係嫁入豪門做少奶奶。不過二人婚後兩次傳出李雲峰嘅馬可波羅海業集團有財困，令到徐若瑄係2015年生完仔仔Dalton後，極速復工接job賺錢。
徐若瑄當時澄清「從來沒有想要去做貴太太」，兩人對對方事業「保持尊重又互相支持」，各自嘅工作都會全力以赴，暗示產後復工係出於事業心，否認要撲水救夫嘅講法。
李雲峰最近接受新加坡《聯合早報》訪問，證實前幾年油價大跌，令集團財務陷入危機，好彩搵到「白武士」出資6千萬坡紙（約3.5億港元），度過難關。
「有好幾次面對投資方不太友善的態度，受到各種委屈，回到家發一點牢騷，她會用很正能量的話鼓勵我。靈魂伴侶非常重要，家人的支持也非常重要。父親告訴我要負責任、堅持下去，母親鼓勵我船到橋頭自然直。」
李雲峰話好多謝徐若瑄一路陪伴，佢話有時睇到話老婆救夫嘅報導，就盡量唔去睇，以免睇咗會嬲。佢亦都話徐若瑄除咗陀BB嗰時停過工，其他時候都係努力工作緊。
早前徐爸爸於元旦日因感冒引起併發症不治，李雲峰亦飛抵台灣，幫忙照顧子女及處理徐爸爸身後事。佢喺訪問中透露，解決咗公司財務問題之後，同徐若瑄返過台灣同徐爸爸食飯，徐爸爸亦送咗一幅字畫「圓融」畀佢，提示佢待人接物要更圓潤，李雲峰表示呢幅字畫對佢喺處理問題時有好大幫助。
Photo from [email protected]
李雲峰又話：「去年底債務重組完成後，我陪家人到台北時，還跟岳父吃了兩個小時的飯。他很關心，我還跟他交代整個重組過程。沒想到我們到日本滑雪時，就聽說他出事了。」
分享到Line