《孝利家民宿2》朴寶劍參演!16歲時like李孝利定少女時代潤娥?

由今日開始連續3日，朴寶劍會作為《孝利家民宿2》的特別嘉賓參與演出。（網上圖片）

韓國綜藝《孝利家民宿2》，今個月8號先公佈少女時代成員潤娥（又譯：允兒）會接任第一季IU打工生個位，今日又有好消息帶畀觀眾喇！一段時間冇喺電視機前出現嘅朴寶劍都會參加《孝利家民宿2》啊！據消息指朴寶劍作為《孝利家民宿2》特別嘉賓，今日已經抵達韓國濟州島。其實早喺節目組公佈會製作《孝利家民宿》第2季開始，粉絲就一直強推朴寶劍為首選新任職員，加上大家都知道好難得可以透過綜藝節目見到朴寶劍嘅蹤影，更加令人期待佢同李孝利、李尚順以及少女時代潤娥嘅合作火花啊！

2009年只得16歲嘅朴寶劍，原來曾拎住李孝利當時為GUESS拍攝畫報嘅雜誌欣賞！完完全全係歷史嘅痕跡，亦係跨世代嘅合作！（網上圖片）

這幅就是朴寶劍9年前手持嘅雜誌原圖，性感天後李孝利絕對是當年不少韓國男生，心目中的女神！（網上圖片）

另外，少女時代潤娥早喺8號，就已經有消息指會出演《孝利家民宿2》，日前仲畀SONE（少女時代粉絲）影到潤娥著住牛仔褲、運動衫、白色長羽絨以及戴上cap帽，喺街市同李尚順買嘢。不過《孝利的民宿2》就未知幾時先會播出，記者真係好想快啲睇到少女時代潤娥，會唔會好似IU咁畀李孝利訓練做瑜珈啊！

參考來源