【名模Secret】做model要俾公司抽30%傭　被走數可以點算？

Eunis坦言模特兒界也有黑幕。

講完想做model行天橋要具備的條件，以及這行的薪酬參考價，今次就講下其實可以怎樣入行以及這行的行規。咪以為聽人講在街上被星探發掘就斷定係呃人，原來行內確是有這種做法，不過名模陳嘉容（Eunis）就提醒大家：「自己要醒目，如果叫你上公司之後要收你錢嗰啲，就係呃人㗎喇，無理由都未有Job畀你，要你先畀錢出嚟。以前入行難啲，主要都係靠熟人介紹又或者係畀人發掘，但依家多咗好多途徑喇，上網已經搵到好多model公司，搵啲大公司就一定無錯，可以自薦。」

Eunis提醒大家想入行一定要醒目啲。

簽了model agency入行做model之後，每個job公司又會抽幾多傭金呢？Eunis表示：「本地嘅model一般係抽20%-30%，海外嘅model就抽30-40%，因為要計埋機票同住宿嘅費用。呢行係做完先畀錢，我哋通常做完一個job要等45至60日先收到錢。簽angency比自己做freelance嘅保障大好多，有人幫你bargain啲job嘅價錢、有人收數、有安全感。」Eunis曾經有段日子沒有簽agency，自己做freelance接job，就試過被走數。

Eunis覺得簽咗agency會安心好多。

「嗰次係畀製作公司走數，所以對於呢類公司都要小心，唔簽agency嘅風險就係有機會收唔到錢。我個case係間製作公司走咗佬，我損失咗5位數字酬勞，嗰個Job係一早起身過澳門做足11個鐘，結果白做。如果有簽angency公司會有途徑去追討，如果得我自己一個就好難去追，唔通去小額錢債處咩。我簽咗agency後有次又係畀製作公司走數，公司好好，佢哋自己拎錢出嚟畀我。」聽聞接大陸Job好易被走數，不過Eunis就未有遇過這種情況：「搵間好嘅agency好重要。」

Eunis試過白做畀人走數。

做model行騷有時可能會需要演繹一些很性感，甚至裸露的服飾，原來事前是可以講明自己有甚麼要求的，Eunis說：「angency事前一定會問清楚個model有無咩request，會知道曬有啲咩衫，當然無得揀著邊件，但可以要求唔想咩性感程度嘅衫，例如唔著泳衣、內衣呢啲。個客都可能會加錢嚟利誘啲model著，一般都係加多幾千至加多5位數字。」那麼又可有試過被客戶毛手毛腳呢？Eunis表示無試過：「工作出席嘅場合要有經理人或者公司同事喺度，有咩唔對路自己都要避開，走開，要識得執生同埋醒目啲。」

Eunis無試過遇到鹹豬手。

模特兒這行競爭劇烈，當然都會有是非爭鬥搞小圈子等問題啦，Eunis說：「你同agency關係好啲，公司都會落力啲sell你畀啲客，有時又會抹黑唔係自己公司旗下嘅model。係咪存在要陪瞓換job我就唔知，我幾間公司嘅老闆都係女人嚟。有錢收嘅飯局我都無去過，不過我知道實有呢啲不道德嘅交易，唔好話模特兒又或者係artist會有，以我所知就連空姐、做投資甚至係做地產嘅都有。」

Eunis做model多年都好潔身自愛。

參考來源