【使徒行者2】香港收視一般大陸更紅 帶挈演員北上搵食
果子快看
《使徒行者2》播曬，大家有咩評價？（劇照）
《使徒行者2》就已經播完，一場球賽無論踢得幾咁精彩或者幾咁悶，最重要都係個結果，球賽最直接有力嘅結果就係比數，而電視劇當然是收視。《使2》一開播好有頭威，頭一星期平均收視25點，第1集總收視26.7點，算係唔錯。不過之後就真係無咩尾勢，每個星期嘅平均收視都係一直下跌，證明有唔少觀眾中途棄劇離場，可能係頂唔順個個警察都黑警，或者個個古惑仔都臥底喇！
呢套劇成日都要估嚟估去。（劇照）
不過香港觀眾唔受落，唔等於大陸觀眾係一樣，今次TVB同騰訊合作，俾佢哋有率先播放權，效果相當之好。大結局完畢後，在騰訊的總點擊率超過20億，雖然對比真正大陸劇唔算多，不過你見套劇喺騰訊熱搜榜上的劇集能夠排第4，就知道大陸人都相當重視呢套劇。即使早排在大陸同樣有好評的《踩過界》，點擊率亦不如《使2》，原來好簡單，因為當年《使徒行者1》在大陸已經好紅，亦令不少人更加認識林峰、佘詩曼和苗僑偉等等，將他們在大陸的人氣再推升。
拍完《使1》，林峰就正式返大陸發展。（劇照）
今次《使2》亦都係咁，最大得益者一定係周柏豪，因為他一直在大陸都不算有很高的知名度，他在其他傳媒的訪問中也提到，劇集出街後明顯微博的粉絲數量是有所增加，多了人留言和轉發他的微博，亦因為主題目《天網》的關係，有很多人開始知道或者更加留意他原來是一位歌手，開始去聽佢嘅歌，相信連佢自己都唔相信拍呢套劇之後會有呢一種得著。
之後可能更多見到柏豪喺大陸出現，不過佢好似無乜普通話歌。（劇照）
其實TVB近來愈來愈多跟大陸合拍的劇集，《使2》雖然香港收視不太好，不過大陸就有好收穫。這個做法的好處是，TVB除了能夠賺大陸錢之餘，亦可以幫劇中的演員在大陸增加知名度，因為雖然TVB近年可能被很多人批評質素下降，但港劇在大陸其實還有一定的市場，警匪片尤甚。還有香港的演員在大陸也是特別吃香，你見好多香港發展平平的演員上到大陸一樣可以大放異彩。不過有時TVB也要顧及香港觀眾，當你大陸點擊不斷上升，但在香港的收視就不停下跌，絕對唔係一件好事。
分享到Line