做咗9日X寧所謂嘅執貨員，堅系中伏！！

Background: 26歲, 之前除咗做過惠康之外, 全部都係文職工(8-9.5k). 由於想儘快儲筆錢讀書, 所以想搵份人工高少少嘅做(其實唔貪心,掂到12k已經滿足). 月頭喺FB見到有POST請 "男女執貨員" ,其實對做倉都抗拒, 雖然男仔頭d但始終都係女仔. 但睇見人工最高可達13-17k(底薪$10100,無飯鐘,二百蚊交通費,如果做通宵$1500,剩低要靠ot48蚊個鐘同獎金), 1月底仲有雙糧. 而且語音執貨, 諗住自己做自己嘢, 辛苦得嚟唔緊要至怕俾人小到收工. 而且一直到有跑長跑同train開, 咁就心動走咗去3號碼頭見工, 第二日已經有電話叫返工, 第三日就正式返.

DAY1: 一返到去去咗office睇安全、工作資料, 之後睇片做幾題安全測驗, 錯咗會叫你改返正確答案 LOL 

 一日返9個鐘, 食飯有1小時15分鐘. 第一日坐喺冷氣房睇資料做test都搞咗2個鐘 (理得佢,糧照出嘅). 跟住錄音做語音執貨系統之用,之 後有人會教哂你所有野. 第一張單個trainer會拎住個喇叭仔(要聽你既語音執貨指令)扯住條線, 好似放狗咁跟住你執貨. 由於小妹學嘢快手, 第二張單已經自動波. 第三張已經唔使人跟, 跟住除咗食飯之外, 基本上都係拉住個籠車係咁執係咁執, 做完一張單就下一張, 好奴隸feel下不過我接受到, 感覺多勞多得姐, 第一日都做咗5、6張單, 就咁順利結束, 其實唔太辛苦, 因為第一日執輕貨區.

DAY2: 習慣咗好乖咁提前30分鐘返工, 時間預鬆啲. 打咭換衫之後去到搵大家姐報到, 岩岩set好機諗住接單開工喺時候就俾大家姐叫停咗. 話原本新人係要train兩日, 但妳學嘢太快唔使再train, 所以今日調妳去其他部門第二啲位學多d野 (哦, 原來學嘢快係罪過...) 哦完之後仲surprise, 所謂嘅其他位原來就係執籠車, 幫手開籠拆籠砌籠...... 真正如果執貨, 做一張單先開一個籠, 最多兩個... 但係呢日我開咗唔知有冇300個籠, 未計拆個d爛籠. 如是者玩籠玩足8個鐘, 收工嘅時候隻手同膊頭連換衫都舉唔起. 但係心諗過渡嘅姐, 頂硬上.

DAY3: 終於可以返去輕貨區繼續奴隸式聽電腦執貨, 唔知點解超感動! 執足8個鐘, 收工! 感覺已經拍住做落個喲啊叔, 其實真係手板眼見功夫, 但快手得嚟一定要細心, 所以都叫岩我做嘅.

DAY4: 繼續執貨, 其實第執第3日已經可以話上手, 當然有好多位有加快空間.

DAY5: 繼續執貨, 但食完飯之後俾人調咗去執奶粉, 重好多而且執慢咗, D單惡啃咗, 要不斷行, 感覺所謂獎金根本係空話浮雲, 好單同新人係無緣. 而且頭7日係唔會俾妳OT. 不過1萬蚊... 照殺!

DAY6: 執奶粉都重貨, 其實輕貨區都係俾新人頭一兩日上堂, 學識之後就會調走妳, 大把老屎忽、皇親國戚幾時輪得到你, 只能當一隻奴隸獸...... 不過其實都頂得順, 貨雖然重咗D, 但始終最enjoy自己做自己嘢, 做夠單冇人會小妳, 夠鐘就收工, 開始感覺都可以最起碼做到出雙糧. 有感DAY2 開咗成日籠都係值得.

DAY7: 照舊提前30分鐘返到去, 誰知惡耗降臨. 啊head話今日貨多, 執貨區人手夠(咁點解你仲請我返嚟執貨?), 叫我同另外幾個相信都冇咩人緣嘅同工去派貨區幫手搬貨... 一聽搬貨心入面當堂打個凸, 但又冇得say no, 心諗可能一日半日姐, 唯有頂硬上. 呢區得一把大風扇, 但吹到既位係唔會分俾你, 幾分鐘已經濕身... 話說點知原來係搬花生油

 一箱24枝, 之後洗頭水早知乜鬼都一箱箱重貨, 照單放籠, 做得慢俾人小, 飲水俾人小, 放得唔靚俾人小(話時話係咪唔知我係女仔...雖然我有介紹自己,但我個名好快已經變成"娘親"同"XX"同"Y"同"Z"...), 幾經辛苦捱到食飯, 其實已經散灑, 但都懷抱希望可以返返去執貨區, 但邊有咁SO, 下半場仲柑, 搬貨之餘要拉籠去車場, 拉得慢照樣俾人小, 好似一次拉兩個都唔夠咁(但係我只得兩隻手), 最後玩埋唧車, 拆板, 拆完一板又一板, 拆完自己搬貨, 玩完一批籠要自己開, 唔係一個兩個, 係三、四十個, 啲貨一批一批源源不絕咁嚟... 去到呢度, 我淨係心諗, 我仲係唔係收1萬蚊既執貨員?

DAY8: 諗住已經捱過, 點知繼續話今日都係貨量多, 執貨區人手夠, 照樣踢我埋去派貨區, 唔夠人時推上貨車都有做埋, 同DAY7一樣, 臨收工搵大家姐問咗幾句, 一開頭話係執貨區要TRAIN 7日俾我習慣, 幾時調返我執貨. 大家姐話妳新人, 貨量多唔敢俾我執...... (o咀, 邊日係唔多貨架)

DAY9: 真係差唔多死心, 照舊繼續搬貨, 其實前兩日放工已經行都唔識行, 舉手截巴士都痛 

 但今日唔同既係, head開我小咗我兩日個個已經冇做, 得返我同另外個啊叔, 基本上推哂俾我搬, 沒有最辛苦 只有更辛苦. 搬咗幾板走返去同大家姐講唔做, 佢仲問我點解, 我唯有答佢我嚟係做執貨員唔係倉務員. 

p.s. 見到佢係咁請人都知係伏, 但心諗執貨員伏極有限, 其實借請執貨員之名, train你一兩日就調你去做其他位, 語音執貨? 算吧啦...

參考來源