唔係講笑，銅鑼灣公共圖書館係識學生妹既最好地方

係邊度認識女仔，就決定你想認識咩女仔，係酒吧識女，好多女都係想認識啲識講野，貪玩同刺激既男仔，加上認識完之後激情一過，就會不了了之。係交友app認識女仔，好多女仔主要係睇你有無錢，有無啲靚車相靚樓相放上去，先主動同你傾計，有啲更賤既就叫你買保險買金買美容療程，真係超唔現實，就算朋友介紹下，都未必介紹一個有共同興趣同互相有好感既人。但係係公共圖書館就唔同，一般肯花時間去睇書既人，

一般佢睇物質既需求都唔太高，因為如果一本書，已經可以滿足到佢五個鐘甚至更長時間，咁佢根本無時間去做其他要物質活動。當然唔係叫你係圖書館見女都溝，你首先要觀察下條女睇咩書，而你平時又睇開咩書，搵一個有共同興趣既女仔，再觀察下佢係唔係用心去睇，你先坐係佢旁邊同佢一齊睇書，之後一個鐘左右，你就可以同佢開始傾計，你就可以講下原來大家都鐘意睇e類型既書，睇下佢有咩反應，如果佢受就掂，唔受就算去搵第二個目標。咁當然你要著得斯文少少，著型少少，

比佢覺得你唔係衰人，加上你千萬唔好怕羞，被人拒絕就被人拒絕，又唔會少左塊肉，不過如果比你係圖書館溝到條女你就發達，第一，大家既興趣都比較接近，因為大家都鐘意睇相同類型既書，第二，平日拍拖又可以同佢去睇下書，減少去行商場購物時間，真係幫你慳唔少，第三，鐘意睇書女仔起碼有少少文化，唔會話太濫同太粗魯同港女化，e啲女仔絕對超合適做老婆，我本人就係一名成功例子，係三個幾月前就鐘意去公共圖書館，先觀察啲女鐘意睇咩書，因為本人比較鐘意睇一啲養生同健康同健身書籍，所以一見到有合眼緣女仔睇e類型書，就拿埋本書坐係佢旁邊同佢一齊睇，

睇到一段時間之後主動同佢傾計，當然有啲就傾左幾句佢就走左，有啲就話叫我唔好吵到其他人，不過憑住我堅毅決心，終於比我認識到一個女仔，我都係見佢睇左本教健康飲食既書一段時間，我就主動出擊，一傾之後大家好啱傾，仲搵左個圖書館比較少人地方一直咁傾，當晚仲一齊吃飯同留埋電話，之後一有時間就約佢去圖書館見面，佢又鐘意養生同做運動，我地又約埋一齊去跑步同游水，加上我地有共同話題真係好好傾，

同佢一齊真係好開心，所以我覺得如果你係想搵一個長遠發展既另一伴，可以試下係公共圖書館搵，因為我覺得初戀係最美好，初戀主要都係讀書時期發生，而更重要係讀書時期戀愛都唔太受物質影響，係最純潔同寶貴既，希望大家都可以係公共圖書館搵到一個可以值得一齊既另一伴

參考來源