(無左兩萬) 請所有準備結婚、已婚、及有朋友準備結婚的朋友留意！ 我比間鋪呃左 我2萬按金

致所有既朋友：以下係我親身經歷

本人於2016年10月25日join左左一間婚紗公司 ,Bid Day為2016年11月21日，當時負責sale我地既係一位叫Constance Tse 既人（原來佢係婚紗公司老闆娘），其實開頭入去既時候老師娘既態度都唔算友善，有D串添，不過傾傾下又覺得ok丫，同埋因為我係Facebook 見到佢個homepage Show出黎件婚紗（皇後婚紗）我真係好鐘意，所以當時就算件婚紗無package要獨立加錢我都照join!總共我係訂左5套衫、老公2套，到我同老闆娘再傾落去，老闆娘見到我背脊有紋身（有一隻手掌再大d 既size)，都好主動問我要唔要遮左佢，佢都話俾長輩見到其實唔係咁好，我問佢有咩辦法，佢就提議用「高清噴槍」，佢話係好有用架，出黎效果一定無人睇到，仲話係零毛孔，但佢話因為我個紋身係有唔同顏色，一般噴槍遮唔到，同埋個size比大，所以要加錢（加$ 1980），咁我都覺得ok既，咪加lo,成張單總共租衫、化妝、攝影、高清噴槍，共$ 25868。

Join完呢間公司後至big day前一年間既時間其實我身邊都有唔少人話我知呢間公司唔好丫、老闆娘好有問題丫、甚至有客人俾左錢但件貨無如期送到⋯老實講，當時我係擔心架，不過我又可以做咩呢，錢又俾哂，同埋我當時會覺得一定係佢同個客出現左咩誤會先會搞成咁ja，我對佢好佢都會對返我好既，加上呢一年時間入面我係婚禮上遇到咩問題問佢佢都會幫我手去諗解決辦法，佢應該唔會咁對我既。

直到我big day前一日2016年11月20日，我、老公、伴娘三個人一齊去拎禮服，順便放低埋老闆娘指定按金 2萬（之前話3萬，到當日佢話2萬就得），老闆娘仲話佢試下盡趕係5:00黎到酒樓幫我著件婚紗，因為件婚紗都比較難搞，佢會識去處理，但因為佢當日3:00有客，所以保險起見佢都教定件娘點同我著先。

2016年11月21日 Big day當日，老闆娘同佢老公大既7:00先趕到，咁5:00換衫既責任就左俾件娘，到我6:00證完婚換返迎賓衫，我就將件婚紗放左係張櫈度，打平放都唔敢掛起，由於件婚紗係釘滿閃石實在係太易就鉤到野，所以我當時選擇俾張櫈佢獨立放，老闆娘一入新娘房見到件婚紗都有問點解將佢件婚紗咁放，我都解釋話因為轉頭8:30我都要再著返進場，同埋佢真係易鉤到所以先平放係張櫈度，當時佢都無再講其他野。

直到我第二次進場完畢換衫準備敬酒既時候佢就再入黎，跟住行過件婚紗度講：「譁，件婚紗搞咩丫？」我當時先發現原來用黎遮背脊紋身既「高清噴槍」甩色，甩左d粉底落件婚紗度，我可以老實講，個甩色既範圍係同我紋身個size差不多，即係整個噴槍都甩色，老闆娘當時面色一沉，淨係叫我試下整甩佢睇下可以甩到幾多，仲話之後第二日就有第二個客要用，唔知點算，然後影左幾張相就行出新娘房，轉頭佢再走入黎房同我講件婚紗原本第二日就有客要用，仲要係麻煩客，而家件婚紗搞成咁，佢唔用得，佢話佢要諗辨法，當時我都唔係咁開心架，但婚宴仲要繼續，我已經無乜心機，雖然我知問題唔係我身上，我都會幫佢諗 咁佢點算，之後老闆娘同佢老公無聲無息咁走咗，我見到佢地走，但係我唔得閒去送佢地，化妝師見我無哂心機都叫我唔好諗，但係我又點可以唔諗丫！

其實當晚有好多人比左意見我同埋教我點清洗，我本身都諗住好黎好去 最多乾洗錢大家一人一半，咁做大家都開心，其實我都諗得好清楚 1.紋身婚紗公司係知，仲叫我加$1980去join個「高清噴槍」2. 化妝師都係你公司提供既，咁個責任就唔係我到啦，但係始終朋友都係擔心我上到去比人「湯」結果就同一位朋友上去還衫.

2016年11月22日 1:00p.m 還衫，我地一行三人上到去間公司，開門既係佢老公，一黎第一句：你地搞咩黎丫，搞到我件婚紗咁樣，你地唔愛惜我啲衫，我地做唔到朋友喇，之後佢係收貨既過程都一直發脾氣，不停話我地，話我地點解會老闆娘入左新娘房會見到件婚就咁放左係度，我就解釋話我仲要著多次出場，同埋放果到無咁就易比野鉤到，佢話一早講咗所有衫著完就要放箱（我發誓我無聽過佢淨係教我點著啲衫，又話我地一啲危機意識都無先搞衫咁，我話個高清噴槍係你地叫我join既，我唔知會甩色，佢老公話：你地成年人黎架唔洗下下都要人教丫，跟住我就話化妝師都有責任，佢就話唔好賴落化妝師到，所有責任都係我身上，佢話我應該再用塊布隔住條裙，呢個時候老闆娘就講：「你地搞到我件婚紗咁樣我都唔知點算，我之後仲有幾個客特登加錢去租呢件婚紗，」

佢老公就再出聲：「唔駛再扮野喇，由一開始你地一黎我已經知你地想點啦，想唔認數，想推卸責任，唔駛諗啦，而家我話你地知，錢我就一定會罰架啦！你地俾個兩萬按金我要全部扣哂！」我一聽到呢度馬上爆喊，我老公同朋友都即刻安慰我，但我真係忍唔住，我喊既原因唔係因為錢，而係因為我覺得好恐怖丫，點解佢地可以將所有野都調返轉黎講，點解所有責任而家都係我度？我以為我對你好，當所有人攻擊你話你唔好我都仲選擇去支持你⋯點解，我不停問自己⋯

佢老公見到我喊成咁仲叫我地大家都冷靜d,話錢點都一定要扣，其實扣左都唔知夠賠俾邊個客添！我老公見我喊到收唔到聲就叫左我出門口，唔好再留係入面聽，跟住再打俾陪我地上黎個朋友既老公上黎睇下仲可以點傾，我係出面都間中聽到佢講咩報警丫、咩律師信丫、咩記者，老公再走出黎同我講原來佢想拎走件婚紗去乾洗完先再還，2萬數按金就唔拎住照放係度先。點個婚紗公司唔肯，仲話張單寫到明係有咩損壞、污漬要賠錢同埋無得拎走件貨，呢招真係高招，我地啞哂，我明知件婚紗係可以洗得甩，但我拎唔走件衫，佢仲話唔怕我地報警架，張單寫到明，又話唔怕我地告佢，佢拎左一疊律師信出黎話佢慣左俾人告⋯好野！你得左！

我地嘈到2點幾真係唔可以再嘈落去喇，我仲要趕去機場去旅行，最後我地選擇左當跌埋個2萬，都唔想再嘈，我已經心力交瘁⋯⋯

成件事既經過我交代得好清楚，無加多/減少，我唔知會有幾多人覺得都係我錯，係！我係錯，我錯在第一次結婚唔知原來高清噴槍會甩色、我錯在人地叫我加錢我就加無諗其他、我錯在我唔識去防人⋯有人話一開始好明顯已經係個局，我唔想諗（雖然真係明顯到傻既都知）有人話我慘，我可以話我勝在當晚所有人都會話我d衫靚，我同老公無後悔過搵呢間公司，係無諗到個結局搞成咁ja！）電影都有教：人生難免會遇上幾個僕街，要多謝佢地令我又上一課！

我將成件事講出黎係想俾所有關心我既朋友知我無事，同埋亦同提醒所有計劃結婚既朋友：唔好將所有事都睇得咁簡單、美好！

重申：我唔係要任何人去報復丫之類既野，我只係想用最簡單既方法去令所有人去知呢件事既真相，唔好再俾人誤導！

＿