家常系列：韓式辣炒雞

京蔥一碌。

日本椰菜半個。

韓國辣醬。大少少嘅超市實有得賣，如吉之島，十零廿蚊。

韓式香梨燒烤醬（Bulgogi）。大少少嘅超市實有得賣，如吉之島，十零廿蚊。

雞件；二人份量，500-600gram。其實唔喜歡有骨可買雞扒或雞胸等等。

第一時間醃雞。先落燒烤醬撈勻，後落辣醬。超微辣就半湯匙，歡喜辣啲一兩匙都得。

醃最少半個鐘。其實要返工嘅朋友，前一晚洗完碗醃定，第二晚放工返嚟係雪櫃攞出嚟就煮得，都真係十分唔錯。

京蔥斜切厚片。

椰菜隨意切大大塊。

中大火爆香京蔥。

跟手落雞兜幾嘢。兜完由得佢唔好郁，等啲雞有機會被煎下。過一兩分鐘又兜下，又煎下直至筷子串得過啲雞。總之最緊要夠乾身先好食。

最後落椰菜炒至軟身就上碟食得！

參考來源