33歲馬貫東入行14年冇錢開飯一個麵包食兩餐 孝順仔最大願望買樓送家人

馬貫東入行14年默默等機會

無線經常被觀眾批男一女一來來去去都係得幾個，睇到厭！新劇《那些我愛過的人》終於帶來新鮮感，馬貫東演活了患有亞氏保加症的古怪醫生古希晨，他與連詩雅這對醫生CP贏盡觀眾歡心，搶眼程度甚至凌駕於男女主角林文龍與黃翠如之上。之前毫不起眼的馬貫東被讚演技大爆發，拿捏角色精準，自閉言行入曬血，表現攞滿分。馬貫東在新劇《那些我愛過的人》飾演患有亞氏保加症的古希晨醫生，角色性格沉默寡言，倔強固執，不愛與人接觸或直視超過兩秒，動作語速飛快說話硬繃繃，對他而言是演技的一大考驗。

馬貫東追求連詩雅的劇情追看性甚高，網民力讚他演技好，對他另眼相看。馬貫東中七畢業後參加無線電視第21期藝員訓練班入行，一直做茄喱啡，16年在劇集《鐵馬戰車》內飾演警長「揚名」一角演出生動，同年加入無線處境劇《愛‧回家之八時入席》首次飾演戲份較重的角色 唐中書（十仔），直到17年參演《愛‧回家之開心速遞》憑秦博思（博士）一角終於受到觀眾及網民注目，並獲提名《萬千星輝頒獎典禮2017》「最佳男配角」。默默耕耘等待機會的馬貫東，一等就十四年，入行頭幾年人工之奀，自己都養唔掂，令他一度想轉行，幸好有母親及兩個家姐的無條件支持及鼓勵，他才咬緊牙關捱過去。《那些我愛過的人》的男一及女一是林文龍與黃翠如，不過馬貫東與連詩雅這對 CP卻搶 fo成功，為觀眾帶來新鮮感。劇情講述馬貫東自小被母親程可為溺愛，與連詩雅婚後需時間磨合，婆媳對決甚有火花。據知情者透露：「Mark（馬貫東）份人比較被動，唔鍾意講嘢，以前亦唔埋堆，喺呢行真係輸蝕，佢一直都等好角色同發揮機會，就算奸角同變態佬都唔介意去做，做藝人講天時、地利同人和，Mark個樣唔係出眾，條件真係好普通，佢試過冇劇拍，知名度唔高，商演同代言又冇，真係靠黐屋企過活，最黴嘅時候佢諗過轉行唔撈，不過孻仔孻心肝，佢媽咪同家姐都好錫佢，知佢真心鍾意演戲，鼓勵佢唔好半途而廢，為咗堅持追夢早年冇錢畀屋企，佢覺得愧對家人。不過Mark都唔係放軟手腳，佢會諗辦法幫補生計，早年做過婚紗攝影助手，邊拍劇邊同朋友搞生意，又做健身教練，後生仔有嘅係時間同機會，佢係一個好積極嘅人，而且唔會忘本，佢承諾過第時有成就搵到錢，一定會好好報答屋企人。」馬貫東從小在單親家庭成長，跟母親和兩位姊姊同住，入行頭幾年窮到燶，幸有家人支持他追夢，成為他最強後盾。

花七年時間衝刺 40歲前成家立室

藝人收入不穩定，雖然憑新劇人氣急升，但馬貫東在疫情期間工作亦受到影響，最近他與友人合資搞湯包及花茶生意，日前見他親力親為搬貨又揸車去送貨，搵錢動力十足。事業起飛的馬貫東，感情生活亦穩定，據知他為自己定下了目標，希望能在四十歲前有一番作為然後成家立室，知情者說：「馬明都係45歲先拎視帝，Mark今年33歲，依家發力都唔算好遲，古醫生個角色依家出曬位，嚟緊佢應該大把機會，Mark希望呢幾年可以喺演藝事業上衝刺，之後結婚組織家庭，佢為人定性用情專一，入行咁多年緋聞都冇單，現任同前任女友都係圈外人，亦因為咁佢想保護對方，唔想拍拖太高調。」人怕出名豬怕肥，馬貫東有知名度後就好難低調，況且索女友咁有質素，選港姐都仲得，又怕咩見人呢喎！

未曾在台慶頒獎禮獲獎的馬貫東，今年有機憑古希晨醫生一角吐氣揚眉。花了十四年追尋星夢的馬貫東，演過不少角色，不過近年才受到注目，由正直陽光十足的《愛回家》博士到《金宵大廈》的變態偷窺男，馬貫東都駕馭得到。17年在《愛‧回家之開心速遞》中憑秦博思 （博士） 一角嶄露頭角，他與謝芷倫飾演的Mandy在劇中飾演情侶一同受到網民注目並獲提名《萬千星輝頒獎典禮2017》「最佳男配角」他每天偷窺住在隔壁的歐陽巧瑩，去到不能自拔的地步，予人一種變態的感覺。

馬貫東：想買樓俾媽咪

記：本刊記者 馬：馬貫東記：新劇個角色令你彈起，開唔開心？馬：梗係開心！大家咁鍾意古希晨醫生，我亦達到目的，想多啲人注視呢個症，多啲關心同了解患者。記：有冇信心今年台慶頒獎禮有獎攞？馬：有得參與已經好開心，做咗十幾年終於獲得認同，有獎係一種鼓勵，冇獎亦唔會唔開心，唔會畀自己太大壓力。記：屋企人幫咗你好多？馬：唔係佢哋支持我，一早已經唔喺呢行啦！早年我冇畀家用佢哋都冇逼我，仲好支持我做任何事。記：最黴嗰時有幾坎坷？馬：我試過一個麵包分兩餐食，不過唔係好長時間，盡量唔想問屋企攞錢，佢哋已經無條件去支持我。記：依家經濟好咗，有冇目標？馬：依家儲到錢我會畀家用，第時想買層樓畀媽咪，三房單位啦！最緊要一家人一齊住。記：影到你有個新女友？馬：開始咗唔係長時間，佢係圈外人，唔想有太多不必要嘅壓力，大家畀啲空間我啦！

馬貫東在旺角街頭接受本刊記者訪問，他表示一直住在家姐名下的物業，早年入不敷支冇交租仲要家人接濟，感激家人多年來的支持。

參考來源